Ev heyvanlarını manqaldan uzaq saxlayın – Ciddi risk var

Tonqal və ya manqaldan çıxan tüstünün tərkibindəki zəhərli yanma məhsulları ev heyvanlarının həm gözlərinə, həm də tənəffüs sisteminə mənfi təsir göstərir.

24Xeber.az -ın məlumatına görə, bu xəbərdarlıqla baytar həkim Natalya Kolesnikova gazeta.ru-ya açıqlamasında çıxış edib.

“Manqal və tonqal külü heyvanın gözünə düşərək yaşarma və müxtəlif zədələrlə nəticələnə bilər. Gözün yanması görmənin kəskin zəifləməsinə səbəb olur. Bundan başqa, zəhərli tüstü hissəcikləri ağciyərlərə keçərək nəfəsalmanı ağırlaşdırır, güclü qıcıqlanma, boğulma və öskürək kimi problemlər yaradır”, – deyə mütəxəssis bildirib.

Ev heyvanlarını od və manqaldan minimum 3-5 metr uzaqlıqda saxlamaq tövsiyə olunur. Onların atəşə yaxınlaşmasının qarşısını almaq vacibdir. Çünki tüstüdən zəhərlənmə ilə yanaşı, isti şişlər və manqal səthi dəridə ağır yanıqlara səbəb ola bilər.

Mütəxəssisin sözlərinə görə, ocağın ətrafına heyvanları uzaqlaşdıran qoxular – istiot, xardal və ya sitrus meyvələri qoymaq faydalıdır. Belə ki, itlər və pişiklər bu qoxulardan çəkinirlər.

Heyvanınızın tonqala və ya manqala yaxınlaşdığını görsəniz, onun vəziyyətinə xüsusi diqqət yetirin.

“Manqaldan qalxan tüstü yalnız pis qoxu demək deyil, o, ev heyvanının həyatı üçün təhlükəli olan toksik maddələrin toplusudur. Tüstüyə məruz qaldıqdan sonra dördayaqlı dostunuzda şiddətli öskürək, xırıltılı nəfəsalma, müvazinətin itirilməsi, qusma, ishal və ya həddindən artıq ağızsuyu ifrazı müşahidə olunarsa, ləngimədən baytar həkimə müraciət etmək lazımdır. Belə hallarda ehtiyat tədbirləri görmək ciddi fəsadların qarşısını ala bilər”, – deyə N.Kolesnikova fikrini tamamlayıb.